Það eru engar líkur á því að Joao Felix sé á förum frá Atletico Madrid í sumar en leikmaðurinn segir sjálfur frá þessu.

Felix var á sínum tíma talinn einn efnilegasti leikmaður heims en hann hefur ekki alveg náð að standast væntingar eftir að hafa skrifað undir á Spáni.

Felix kom til Atletico frá Benfica í heimalandinu Portúgal árið 2019 og er dýrasti leikmaður í sögu spænska liðsins.

Ensk félög hafa verið orðuð við Felix en hann hefur útilokað það að yfirgefa Atletico í sumar.

,,Að yfirgefa Atletico er ekki í boði. Ég er mjög rólegur þegar kemur að framtíðinni,“ sagði Felix við portúgalska miðla.

,,Ég veit hvað ég get gert og mér líður vel. Ég er enn í sumarfríi og var að byrja að æfa til að undirbúa mig fyrir undirbúningstímabilið. Ég hugsa ekki of mikið um fótbolta.“