Aðeins eru um þrjú þúsund miðar seldir á landsleik Íslands og Ísrael í karlaflokki í kvöld. Leikurinn er liður í Þjóðadeildinni. Um sjö þúsund miðar eru því enn lausir. Fréttablaðið skýrir frá þessu.

Um þýðingarmikinn leik er að ræða fyrir bæði lið. Með sigri er Ísland komið í dauðafæri á að tryggja sér þátttökurétt í umspili um sæti á Evrópumótinu árið 2024. Topplið riðilsins tryggir sig þar inn en sem stendur er Ísrael efst, tveimur stigum á undan Íslandi.

Fjórir riðlar eru alls í B-deild Þjóðadeildarinnar og efstu liðin fara þvi í 4-liða úrslit, sem lýkur svo með úrslitaleik.

Miðasala var einnig dræm fyrir síðasta heimaleik karlalandsliðsins gegn Albönum. Þá tók hún hins vegar kipp skömmu fyrir leik. Það er vonast eftir því að staðan verði einnig sú í þetta sinn.