Það er mikið talað um íslenska karlalandsliðið þessa dagana en liðið stendur nú í miðju verkefni í Þjóðadeildinni.
Ísland hefur gert jafntefli við Ísrael og Albaníu til þessa og vann þá einnig lélegasta landslið heims, San Marínó, með einu marki gegn engu.
Margir kalla eftir því að það verði breytt um landsliðsþjálfara en Arnar Þór Viðarsson hefur sinnt því starfi ásamt því að starfa sem yfirmaður knattspyrnumála.
Það var aðeins rætt þetta mál í útvarpsþætti Fótbolta.net um helgina þar sem þeir Elvar Geir Magnússon og Tómas Þór Þórðarson fóru yfir stöðuna.
Tómas kemur með athyglisverðan punkt í þættinum og segist efast um að formaður KSÍ, Vanda Sigurgeirsdóttir, sé týpan í að reka fólk, að hún vilji frekar vinna úr hlutunum.
Ef Ísland vinnur ekki Ísrael á morgun þá verður kallað enn harðar eftir því að Arnar verði rekinn en frammistaðan hefur því miður ekki verið nógu sannfærandi á neinn hátt.
,,Nei. Er ekki vanda Vanda nýbúinn að koma með stuðningsyfirlýsingu því hún er svo hrifinn af þessu unga landsliði okkar. Ég bara sé hana ekki fyrir mér sem týpu til að reka fólk. Ég held hún reyni frekar að vinna í hlutunum,“ svaraði Tómas Þór er Elvar spurði hvort Arnar yrði rekinn ef Ísland myndi tapa á morgun.
Elvar nefnir þá að Ísland sé búið að spila þrjá leiki í glugganum án þess að tapa og svaraði Tómas þá nokkuð kaldhæðnislega.
,,Já, eru þetta ekki framfarir? Leikurinn við Albaníu var ekkert spes.“
