Það er að byrja páskafrí í Grikklandi. Páskarnir eru stærsta hátíðin þar, þeir eru um næstu helgi. Börnin á eyjunni Folegandros fara út og mála strik með hefðbundnum hætti á gangstéttarnar. Þarna inni í bænum er engin bílaumferð, þeir komast einfaldlega ekki leiðar sinnar og því geta börn leikið sér í friði á götunum. Það hafa þau gert í aldaraðir. Hringurinn í miðið er gamla ólívupressan á eyjunni. Það er ágætur leikvöllur líka.

Það þykir sjálfsagt að hver íbúi sé ábyrgur fyrir því að halda hreinu og snyrtilegu í kringum hús sitt. Steinarnir á götunum eru úr klettum og fjöllum á eyjunni. Sumar göturnar voru á sínum tíma lagðar af útlögum, en í Grikklandi tíðkaðist lengi að senda stjórnarandstæðinga í útlegð á afskekktar eyjar eins og þessa. Þeim þótti farnast nokkuð vel á Folegandros enda íbúarnir vingjarnlegir, en skipaferðir gátu verið afar stopular.

Vinafólk mitt frá Ameríku var svo hrifið af berginu á Folegandros að það vildi taka með sér steina og helluleggja baðherbergið hjá sér í Los Angeles. Það reyndist vera of þungt. Ég kann ekki að nefna bergtegundina en hún hefur yfir sér dálitla græna slikju.