Roman Abramovich er líklega einn þekktasti rússneski olígarkinn á Vesturlöndum. Aðallega vegna eignarhalds hans á enska knattspyrnuliðinu Chelsea. Hann er sagður góður vinur Vladímír Pútín, Rússlandsforseta, enda útilokað að auðgast mikið í Rússlandi nema vera í nánu vinfengi við Pútín. En hvernig komst Abramovich til efna?

BBC hefur kafað ofan í málið og varpað nýju ljósi á spillinguna í tengslum við auðsöfnun Abramovich.

Allt hófst þetta 1995 þegar Abramovich keypti olíufélag af rússneska ríkinu. Hann greiddi 250 milljónir dollara fyrir félagið en seldi það 10 árum síðar á 13 milljarða dollara. Kaupandinn var rússneska ríkið. Ágætis hagnaður á aðeins 10 árum.

Kaup hans á olíufélaginu áttu sér stað á uppboði þar sem rangt var haft við. Boris Berezovsky, fyrrum viðskiptafélagi hans, höfðaði mál á hendur honum árið 2012 fyrir þessu spilltu kaup. Abramovich hafði sigur fyrir dómi þrátt fyrir að hann hafi skýrt frá hvernig uppboðinu var hagað til að tryggja að hann fengi olíufélagið og að hann hefði látið Berezovsky fá 10 milljónir dollara til að greiða embættismanni í Kreml í mútur.

Fréttaskýringarþátturinn Panorama á BBC hefur komist yfir skjal sem talið er að hafi verið smyglað frá Rússlandi. Að sögn heimildarmanns er það sagt vera afrit af skjölum um Abramovich sem rússnesk yfirvöld hafa í sinni vörslu. BBC gat ekki fengið þetta staðfest en aðrir heimildarmenn í Rússlandi sögðu innihald skjalsins vera rétt.

Í skjalinu kemur fram að Abramovich hafi svikið rússneska ríkið um 2,7 milljarða dollara. Saksóknarar ætluðu að ákæra Abramovich fyrir fjársvik en Boris Jeltsín, þáverandi forseti, hélt verndarhendi yfir honum. Málið var tekið úr höndum saksóknara og sett í hendur embættismanna í Kreml. Þar var rannsóknin stöðvuðu og aðalsaksóknari málsins rekinn úr starfi. Það var kynlífsmyndband sem var ástæðan fyrir brottrekstri aðalsaksóknarans, Yuri Skuratov. Hann hefur sjálfur sagt að um samsæri hafi verið að ræða.

Tveimur árum síðar ætlaði Abramovich að bjóða í annað rússneskt olíufélag en þá kom í ljós að kínverskt fyrirtæki ætlaði einnig að bjóða í það og það tvöfalt hærri upphæð en Abramovich.

En þegar fulltrúi Kínverjanna kom til Moskvu til að leggja tilboðið fram var honum rænt á flugvellinum að því er segir í fyrrnefndu skjali. Af þessum sökum gat kínverska fyrirtækið ekki lagt fram tilboð í olíufélagið. Það var ekki fyrr en það hafði opinberlega fallið frá því að bjóða í olíufélagið sem fulltrúi þess var látinn laus.

Á uppboðinu var það síðan bara boð frá Abramovich sem kom fram.

BBC segir að ekkert bendi þó til að Abramovich hafi vitað af mannráninu eða komið að því.