Manchester United tók á móti Arsenal í ensku úrvalsdeildinni. Leiknum lauk með 3-2 sigri heimamanna.
Arsenal komst yfir þegar tæpur stundarfjórðungur var liðinn af leiknum en markið var mjög umdeilt. Arsenal fékk hornspyrnu og virtist Fred, miðjumaður Manchester United, hafa farið í David de Gea og hann lagðist niður á grasið sárþjáður. Smith-Rowe fékk boltann fyrir utan teiginn og skoraði auðveldlega. Bruno Fernandes jafnaði metin rétt fyrir lok fyrri hálfleiks og var jafnt er flautað var til hálfleiks.
Cristiano Ronaldo kom heimamönnum yfir í byrjun seinni hálfleiks eftir flotta sókn en þetta var hans 800. mark á ferlinum. Martin Odegaard jafnaði metin aðeins þremur mínútum síðar eftir góða sendingu frá Martinelli. Manchester United fékk svo vítaspyrnu þegar Odegaard braut á Fred og var atvikið skoðað í VAR. Ronaldo tók spyrnuna og skoraði af öryggi. Ekki voru fleiri mörk skoruð og 3-2 sigur Manchester United niðurstaðan.
Arsenal er í 5. sæti með 23 stig og Manchester United í 7. sæti með 21 stig.
Manchester United 3 – 2 Arsenal
0-1 Emile Smith-Rowe (´14)
1-1 Bruno Fernandes (´44)
2-1 Cristiano Ronaldo (´52)
2-2 Martin Odegaard (´55)
3-2 Cristiano Ronaldo (´70)
