Hér á landi getur réttlæti verið misskipt þegar kemur að glæp og refsingu og skiptir þá mál hver gerandinn er, ekki síst þegar um kynferðisbrotamál er að ræða.

Þetta sagði Þorbjörg Inga Jónsdóttir, lögmaður, á ráðstefnunni Réttlætið í samfélaginu sem fór fram á Hólum í Hjaltadal í síðustu viku. Fréttablaðið skýrir frá þessu í dag.

Þorbjörg hefur sinnt réttargæslu fyrir fjölda kærenda kynferðisbrota á síðustu tuttugu árum. Hún segir engan vafa á að kerfið fari í manngreinarálit eftir þjóðfélagsstöðu. „Ég upplifi að það skiptir mjög miklu máli hver þú ert og hver brýtur á þér í nauðgunarmálum. Ef þú ert hvítur karlmaður í góðum jakkafötum færðu betri framgang hjá lögreglu og dómstólum,“ er haft eftir henni. Hún sagði einnig að það skipti máli hvort um Íslending eða útlending sé að ræða, bæði í tilvikum gerenda og brotaþola.

Hún sagði að hreimur skipti máli við skýrslugjöf hjá lögreglunni og vantrú aukist ef viðkomandi sé með hreim. Ef þolandi eigi sér sögu um fíkniefnavanda eða geðræn vandamál sé honum síður trúað. Hún sagði að barnaverndarkerfið dragi taum þeirra sem teljast til forréttindastétta.

Hún sagði einnig að þolendur í kynferðisbrotamálum geti vænst þess að mörg ár líði þar til dómur gengur í máli þeirra en á sama tíma sé hægt að ljúka rannsókna á skattabroti á þremur mánuðum. Þetta sagði hún sýna gildismat sem gangi gegn rétti einstaklinga.