Jamie Carragher, var allt annað en sáttur með Ole Gunnar Solskjær, knattspyrnustjóra Manchester United eftir leik United gegn Atalanta í Meistaradeild Evrópu í gær.

Solskjær fór í viðtal eftir leik og sagði að stuðningsmenn Manchester United ættu að vita betur en að gagnrýna leikmenn sína og vísaði hann til viðbragða þeirra þegar dómari leiksins flautaði til hálfleiks. Það fannst Carragher skrýtið. ,,Þetta var skrýtið viðtal,“ sagði Carragher í sjónvarpssetti hjá CBS.

Manchester United lenti 2-0 undir í leiknum en þrjú mörk í seinni hálfleik tryggðu þeim sigur og þrjú stig sem liðið þurfti sárlega á að halda. ,,Þessi athugasemd hans um stuðningsmenn liðsins er bara skrýtin í ljósi þess að það voru stuðningsmennirnir sem unnu þennan leik fyrir United í seinni hálfleik,“ sagði Carragher á CBS.

United hefur ekki gengið vel undanfarið og Carragher telur að uppsöfnuð óánægja hafi þarna brotist út en að stuðningsmenn United hefðu sýnt sigg og sannað í seinni hálfleik.

,,Fyrir þennan leik höfðu úrslitin ekki fallið með þeim en þegar að stemmningin er svona á Old  Trafford eins og stuðningsmenn sýndu í gær þá er erfitt að stoppa United, stuðningsmennirnir voru jafn mikilvægir og Ronaldo,“ sagði Jamie Carragher, fyrrum leikmaður Liverpool og sparkspekingur.