Ofát er ekki aðalástæðan fyrir offitu samkvæmt því sem kemur fram í nýrri rannsókn. Rúmlega 40% fullorðinna Bandaríkjamanna glíma við offitu að sögn bandarísku smitsjúkdómastofnunarinnar, CDC, og í Englandi er hlutfallið 28% að sögn breskra heilbrigðisyfirvalda.

Sky News skýrir frá þessu. Offitu fylgja auknar líkur á hjartasjúkdómum, heilablóðfalli, sykursýki 2 og ákveðnum tegundum krabbameina. Fólk sem býr í fátækum hverfum er líklegra til að glíma við offitu en aðrir.

Tölur frá breska heilbrigðiskerfinu, NHS, benda til að rúmlega 11.000 innlagnir á sjúkrahús á árunum 2018-2019 hafi verið bein afleiðing offitu. Innlagnir af völdum offitu voru um tvisvar og hálfu sinni líklegri hjá fólki sem kom frá fátækustu svæðum landsins en þeim efnameiri.

Nýja rannsóknin hefur verið birt í American Journal of Clinical Nutrition. Í henni kemur fram að grundvallargallar séu á orkujafnvægismódelinu og hvernig offita er tengd við neyslu lélegrar fæðu og unnina kolvetna.

Höfundar rannsóknarinnar færa rök fyrir því að betra sé að nota annað módel, kolvetnis-insúlín módelið, sem skýri offitu betur og bendi á leiðir til áhrifaríkari og varanlegri aðferða til að léttast.

Höfundar rannsóknarinnar segja að orkujafnvægismódelið skýri ekki líffræðileg áhrif þyngdaraukningar. Nýja módelið varpar ábyrgðinni á offitufaraldrinum yfir á nútíma neysluvenjur þar sem mikið er borðað af sykurríku fæði, sérstaklega unnu kolvetni. Þetta geri að verkum að hormónar bregðist við á hátt sem breytir efnaskiptum líkamans, líkaminn fari að safna fitu, fólk þyngist og verði of feitt.