KA vann öruggan sigur gegn ÍA í 19. umferð Pepsi Max-deildar í dag. Leikið var á Akureyri.
Heimamenn voru mun sterkari aðilinn í fyrri hálfleik. Bjarni Aðalsteinsson kom þeim yfir með skallamarki eftir fyrirgjöf Mark Gundelach á 27. mínútu.
Jakob Snær Árnason tvöfaldaði forystu KA um tíu mínútum síðar. Hann skoraði þá eftir undirbúning frá Bjarna.
Hallgrímur Mar Steingrímsson setti síðasta naglann í kistu Skagamanna á 77. mínútu með aukaspyrnumarki. Það mátti þó setja spurningamerki við Árna Marinó Einarsson í marki ÍA.
Lokatölur á Akureyri urðu 3-0.
KA er í fjórða sæti deildarinnar með 33 stig eftir 19 leiki.
Skagamenn eru á botninum með 12 stig, 4 stigum á eftir Fylki sem er í síðasta öruggu sætinu. Fylkir á einnig leik til góða.
