Edinson Cavani, leikmaður Manchester United, hefur gagnrýnt harðlega áform eigenda félagsins um þátttöku í Ofurdeild Evrópu.

Hugmyndin um Ofurdeildina var kynnt fyrir tæpum mánuði síðan. Þar ætluðu 12 evrópsk stórlið að taka þátt. Glazer fjölskyldan, sem á Man Utd, tók virkan þátt í því að reyna að setja deildina á laggirnar. Áform um keppnina voru hins vegar stöðuð skömmu eftir að þau voru kynnt til leiks vegna harðra mótmæla stuðningsmanna félgaganna, sem og knattspyrnuheimsins í heild.

Stuðningsmenn Man Utd hafa lengi viljað Glazer fjölskylduna burt og voru tíðindin um Ofurdeildina aðeins olía á þann eld sem fyrir var til staðar. Cavani var alls ekki hrifinn af hugmyndinni um þessa nýju deild og er ekki hræddur við að segja það opinberlega.

,,Þegar ég heyrði af Ofurdeildinni sagði ég við sjálfan mig ‘þetta getur ekki verið að gerast’. Ef þetta getur gerst, hvað gerist þá næst?“ sagði leikmaðurinn.

Cavani er á þeirr skoðun að keppnin hefði útilokað það að stuðningsmenn smærri og miðlungs góðra gætu leyft sér að dreyma.

,,Ég var algjörlega ósammála hugmyndinni. Þú getur ekki hindrað möguleika minni liða á því að spila í Meistaradeildinni eða stoppað miðlungs félög til að keppa við þau stærri, að vera á meðal elítunnar. Þú getur ekki neitað stuðningsmönnum þessara liða um möguleikann á þeirri reynslu.“