Sölvi Tryggvason sendi í dag frá sér hlaðvarpsþátt þar sem hann ræðir sögusagnirnar sem gengu á milli manna seinasta mánuðinn. Sölvi brotnaði niður í byrjun þáttarins þegar hann ræddi seinustu daga.

Sölvi ávarpaði slúðrið fyrst í gær með tilkynningu á Facebook og Instagram-síðum sínum. Þar sýndi hann málaskrá sína hjá lögreglunni seinasta mánuðinn og sýndi hún fram á að engin afskipti voru höfð á honum á þessum tiltekna tíma. Það vakti athygli margra að hann hafi einungis birt málaskránna einn mánuð aftur í tímann en ekki lengra.

Í þættinum útskýra Sölvi og Saga Ýrr Jónsdóttir, lögmaður hans, málið og segir Saga að til að fá málaskránna sem fyrst sé best að biðja um hana frá sem styðstu tímabili.

„Það er mín ákvörðun að sækja hana frá fyrsta apríl, vegna þess að ég hugsaði „Okei, það er sunnudagur, hann segir að það sé allt að springa út af þessu. Ég þarf að fá þetta hratt.“ Ég hefði getað sótt þetta frá árinu 1980. Ég ákvað að sækja þetta frá fyrsta apríl því það dekkar fréttina,“ segir Saga í hlaðvarpinu.

Sölvi bætir einnig við að fyrir sex eða sjö vikum hafi hann leitað til lögreglu þar sem það var manneskja að hóta því að rústa mannorði hans. Hann vildi ekki sýna málaskrá með því atviki þar sem þá myndi fólk halda að hann væri sekur.