Morgunblaðið skýrir frá þessu í dag. Rannsóknin hófst eftir að starfsmaður kvartaði við stjórnina undan starfsháttum Róberts. Stjórnin sendi frá sér tilkynningu í síðustu viku, eftir að lögmannsstofa félagsins hafði rannsakað málið í átta vikur. „Niðurstaðan er skýr og ljóst að efni kvartananna á sér enga stoð. Ekkert bendir til þess að starfshættir Róberts Wessman séu þess eðlis sem greint er frá í bréfinu og engin ástæða er til að aðhafast neitt vegna þessa máls,“ segir meðal annars í tilkynningunni að sögn Morgunblaðsins.
Blaðið segir að Halldór hafi ákveðið að stíga fram sem uppljóstrarinn í málinu í kjölfar þess að nafni hans var lekið en uppljóstrarar í málum sem þessum eiga að njóta verndar. Morgunblaðið segir að Halldór finni að því að honum hafi ekki verið gert viðvart um niðurstöðuna, hann hafi lesið um hana í fjölmiðlum. Einnig þyki honum undarlegt að lesa að hann hafi gert fjárkröfu á fyrirtækið en hann hafi tekið sérstaklega fram að það hafi hann ekki gert.
Morgunblaðið segist hafa séð bréf þessa efnis og segir að Halldór hafi kvartað undan mörgum atriðum, meðal annars vegna ofstopa Róberts í garð undirmanna og fyrrverandi starfsmanna, hafi Róbert tvisvar beitt líkamlegu ofbeldi. „Ég var beinlínis kýldur kaldur í andlitið án fyrirvara í vitna viðurvist. Mér var augljóslega ekki skemmt, og hef ekki orðið var við það almennt séð að forstjórar fari í kýlingaleiki við samstarfsmenn,“ hefur Morgunblaðið eftir Halldóri.
Morgunblaðið segist hafa rætt við vitni að þessu atviki en það átti sér stað í París og staðfesti vitnið lýsingu Halldórs.
Róbert er einnig sagður hafa haft í frammi fólskulegar hótanir í garð fyrrverandi starfsmanna Actavis og hafi þeir haft ástæðu til að óttast um eigið öryggi og öryggi fjölskyldna sinna.
Halldór er einnig sagður hafa bent á að Róbert hafi skipulagt rógsherferðir í fjölmiðlum gegn ýmsum fólki sem hann hafi borið kala til. Meðal þeirra séu keppinautar í viðskiptalífinu og opinberir embættismenn.
