„Ég og enginn hér urðum í raun vör við neitt nema aðgerðir lögreglu seint í gærkvöld,“ segir maður sem býr í næsta húsi við hliðina á húsinu þar sem maður fannst skotinn til bana í gærkvöld fyrir utan. Nágranninn segist enga skothvelli hafa heyrt.

„Við erum búin að fara yfir þetta með lögreglu í dag og við verðum í raun ekki vör við neinn aðdraganda að þessu.“

„Okkur er það hulin ráðgáta,“ segir maðurinnum um þá staðreynd að skotsár voru á hinum látna.

„Við þekkjum þetta fólk ekki neitt, þau flytja hingað í fyrra einhvern tíma. Kaupa þetta hús og gera það upp eða standa í framkvæmdum þarna, bæta við aukaíbúð á efri hæðinni. Að öðru leyti þekki ég ekki til.“

Þessi nágranni segir að par hafi búið á neðri hæðinni og „síðan eru  tvær íbúðir á efri hæðinni þar sem bjuggu par eða hjón með lítið barn, og síðan hjón eða par með unglingsstúlku á efri hæðinni.“

Aðspurður segir nágranninn að vissulega sé fjölskyldubragur á húsinu en bætir þó við: „En alls konar umgangur í  kringum skúrinn, menn að koma og fara og eitthvað svoleiðis.“ Segir maðurinn jafnframt að ekkert ónæði hafi þó verið að þessu. Þessi nágranni þekkir engan með nafni úr húsinu. Þekkir fólkið eingöngu í sjón.

„Þetta er ekki gaman svona í næsta nágrenni við mann,“ segir maðurinn um þennan voðaatburð og er vissulega sleginn.

DV hafði samband við konu sem skráð er til heimilis í húsinu og er talin tengjast hinum látna. Hún vildi ekki tjá sig um málið. Sú kona er íslensk.

Samkvæmt heimildum Fréttablaðsins og Vísis var hinn látni frá Albaníu. Hann var á milli þrítugs og fertugs. Maðurinn sem er í haldi lögreglu, grunaður um aðild að málinu er einnig á fertugsaldri. Hann er líka erlendur.