Tom Brady og félagar hans í Tampa Bay Buccaneers áttu ekki í neinum vandræðum með lið Kansas City Chiefs í Ofurskálinni í nótt að íslenskum tíma. Leikurinn endaði 31-9 fyrir Tampa Bay sem eru því sigurvegarar NFL deildarinnar.

Eins og svo oft áður var Brady í aðalhlutverki en þessi 43 ára liðsstjóri lék sinn tíunda Ofurskálarleik og leiddi lið sitt til sigurs. Þetta var í sjöunda sinn sem hann er í sigurliði Ofurskálarinnar og í fjórða sinn sem Rob Gronkowski, 31 árs liðsfélagi hans, var með honum í sigurliði.

25.000 áhorfendur voru á leiknum sem fór fram á Raymond James Stadium í Tampa. 7.500 af þeim voru heilbrigðisstarfsfólk, sem hefur verið bólusett við kórónuveirunni, sem var boðið sérstaklega á leikinn. Í leikhléinu var það The Weeknd sem sá um að skemmta áhorfendum.