Joelinton, framherji Newcastle United, braut sóttvarnarreglur á föstudaginn síðastliðinn með því að fara í klippingu. Joelinton birti mynd úr klippingunni á samfélagsmiðlinum Instagram. BBC greindi frá.

Samkvæmt núverandi takmörkunum sem eru í gildi í Bretlandi vegna Covid-19 er ekki leyfilegt að fara í klippingu.

Hársnyrtirinn Tom Baxter, klippti framherjann og hefur nú kallað hann hálfvita fyrir að hafa birt myndina á Instagram. Hann viðurkennir jafnframt að hafa klippt marga leikmenn þrátt fyrir að það sé ekki leyfilegt.

„Ef að ég myndi ekki klippa þá, þá myndi einhver annar gera það,“ sagði Tom Baxter, sem viðurkennir þó að hann líti ekki á sig sem hafinn yfir takmarkanirnar sem eru í gildi.