„Athyglisvert að fylgjast með viðbrögðum íslenskra ráðherra á Twitter.“

Þetta skrifar Bjartur Aðalbjörnsson, varaþingmaður Samfylkingarinnar, á Twitter-síðu sinni í dag. Viðbrögðin sem Bjartur á við eru viðbrögðin vegna óeirðanna sem fóru fram í höfuðborg Bandaríkjanna í gær. „ Nú gagnrýna þeir Trump og innrásina í þinghúsið. „Árás á lýðræðið“ segja þeir. Þessir sömu ráðherrar voru hljóðir á Twitter þegar bandarísk stjórnvöld beittu BLM-mótmælendur grimmdarfullu ofbeldi í sumar,“ skrifar Bjartur.

Bjartur segir síðan að sér finnist merkilegt hvernig orðin „árás á lýðræðið“ séu ekki alltaf notuð, eins og þau eigi ekki alltaf við. „Þegar BNA framkvæmir valdarán eða styður við valdræningja í öðrum ríkjum þá skrifa íslenskir ráðherrar ekki Twitter-færslur um „árás á lýðræðið.“,“ skrifar Bjartur í athugasemd við eigin færslu á Twitter.

Eins og sjá má hér fyrir neðan notaði Katrín Jakobsdóttir til að mynda orðin „árás á lýðræðið“ í sinni færslu um óeirðirnar í Bandaríkjunum.

An attack on Capitol Hill is an attack on democracy. We are witnessing disturbing scenes of violence in Washington DC. Liberty, democracy and decency must be respected.

— Katrín Jakobsdóttir (@katrinjak) January 6, 2021

„Mér finnst þetta bara svo mikil sýndarmennska,“ skrifar Bjartur síðan. „Núna, loksins, þegar Trump er búinn að mála sig algjörlega út í horn og á leið út út Hvíta húsinu – þá er óhætt að gagnrýna hann.“

Daníel nokkur tekur undir orð Bjarts í athugasemdum við færsluna. „Nákvæmlega. Auðvelt að tísta og hneykslast yfir þessu akkurat á þessum tímapunkti án þess að fá ekkert annað en jákvæð viðbrögð,“ skrifar Daníel.