„Ég er bara að vinna vinnuna mína,“ sagði Katrín í samtali við Morgunblaðið en blaðið skýrði frá því í gær að Katrín hefði tekið við öflun bóluefna af Svandísi. „Þetta verkefni er búið að vera á borði ríkisstjórnarinnar vikum og mánuðum saman og heilbrigðisráðherra hefur auðvitað haft forystu um þetta mál og fer með þetta mál. Mitt hlutverk í þessu er bara eins og allra annarra forsætisráðherra í heiminum,“ hefur blaðið eftir Katrínu sem sagðist hafa verið í sambandi við Ursulu von der Leyen, forseta framkvæmdastjórnar ESB, um stöðuna á evrópskum bóluefnamarkaði. Hún ræddi einnig við yfirmann bóluefnasviðs Pfizer.
Hefur Morgunblaðið eftir Katrínu að hún hafi verið að verja hagsmuni Íslands en ekki síður að taka púlsinn og kanna stöðuna. „Ég er náttúrlega búin að vera í sambandi við til dæmis Ursulu von der Leyen nokkrum sinnum út af þessum málum og er auðvitað bara að sinna mínu hlutverki í því að taka þátt í að verja hagsmuni Íslands,“ er haft eftir henni.
Hún sagði mikilvægt að minna á sig og glöggva sig á stöðunni sem sé breytileg frá degi til dags.
Í gær var undirritaður samningur við lyfjaframleiðandann Janssen um kaup á bóluefni fyrir 235.000 manns. Áður var búið að semja við Pfizer um bóluefni fyrir 85.000 manns og AstraZeneca fyrir 115.000 manns.
