Emmanuel Macron, Frakklandsforseti, vill að í fyrstu grein frönsku stjórnarskráarinnar komi fram að landið sé skuldbundið til að berjast gegn loftslagsbreytingunum og til að vernda náttúruna. Þetta sagði hann í ræðu sem hann flutti fyrir borgararáð á mánudaginn um loftslagsmálin. Hann sagðist stefna að þjóðaratkvæðagreiðslu um breytingar á stjórnarskránni til að koma þessu inn í hana. Áður en hægt er að efna til þjóðaratkvæðagreiðslu verða bæði efri og neðri deild þingsins að samþykkja breytinguna.

Borgararáðið samanstendur af 150 Frökkum sem voru valdir tilviljanakennt til setu í því. Það hefur það verkefni að koma með tillögur um hvernig er hægt að draga úr losun CO2. Ráðið hefur sett fram hugmyndir á borð við að lækka leyfðan hámarkshraða og að bæta einangrun húsa í landinu. Aðalverkefni þess hefur síðan í júní verið tillaga um stjórnarskrárbreytingar þannig að ákvæði verði sett inn í hana um kvaðir til aðgerða í loftslagsmálum og um náttúruvernd. Macron hefur tekið flestum tillögum ráðsins vel en hefur þó beitt neitunarvaldi gegn nokkrum, þar á meðal um að leyfður hámarkshraði á hraðbrautum landsins verði lækkaður í 110 km/klst úr 130 km/klst.

Hann setti borgararáðið á laggirnar í kjölfar krafna um meira „beint lýðræði“ í kjölfar mótmæla Gulu vestanna 2018 og 2019.