Héraðssaksóknari hefur ákært mann fyrir „sérstaklega hættulega“ líkamsárás eins og það er orðað í ákærunni. Mun maðurinn hafa slegið annan mann ítrekað með flösku í höfuðið.

Árásin átti sér stað aðfaranótt sunnudagsins 8. júlí á Skipasandi. Mun þar hafa farið fram gleðskapur vegna Goslokahátíðar Eyjamanna sem fram fer fyrstu helgina í júlí ár hvert.

Héraðssaksóknari ákærir fyrir brot á 218. grein almennra hegningarlaga og varðar brot á þeirri grein þriggja ára fangelsi, eða allt að sextán ára fangelsi ef notuð eru vopn eða hættuleg tæki í árásinni eða hún ef hún er sérstaklega hættuleg.

Fórnarlamb árásarinnar hlaut af henni kúlu og fleiðursár yfir miðju höfði, sár á gagnauga hægra megin og eymsli í hálshrygg. Gerir hann þá kröfu að ákærði verði dæmdur til að greiða sér rúma milljón í bætur vegna árásarinnar.

Héraðssaksóknari krefst þess að maðurinn verði dæmdur til refsingar og að honum verði gert að greiða kostnað málsins.

Verður málið þingfest 12. nóvember næstkomandi í dómstól Héraðsdóms Suðurlands í Vestmannaeyjum.