Jurgen Klopp stjóri Liverpool er ekki sáttur með Jamie Carragher sérfræðing Sky Sports og fyrrum hetju hjá Liverpool. Mikil umræða hefur átt sér stað um varnarlínu Liverpool eftir að Virgil van Dijk meiddist um liðna helgi.

Van Dijk verður líklega ekki meira með á þessu tímabili eftir að hafa slitið krossband, varnarlína Liverpool má illa við því Joel Matip og Joe Gomez eru varnarmenn Liverpool sem hafa reynslu í hjarta varnarinnar. Matip er hins vegar oft meiddur og er ekki leikfær gegn Ajax í kvöld.

„Við fórum inn í þetta tímabil með þrjá miðverði og Fabinho sem getur leyst stöðuna, svo eru ungir leikmenn,“ sagði Klopp á fréttamannafundi í Amsterdam í gær.

„Það er mjög erfitt að hafa fjóra heimsklassa miðverði í hópnum,“ sagði Klopp sem lét Dejan Lovren fara í sumar.

„Ef einhver vill segja að við höfum gert mistök, sem ég held að Carragher hafi nú þegar gert. Þá eru nokkrar ástæður fyrir því að hann og aðrir eru ekki í starfi þjálfara,“ sagði Klopp pirraður.

Carragher var fljótur að bregðast við. „Ég sagði aldrei að Klopp hefði gert mistök að hafa ekki keypt miðvörð af þessari ástæðu,“ sagði Carragher sem hafði sagt á Sky að Liverpool yrði að kaupa miðvörð í janúar.