Von er á Júlíusi Geirmundssyni til hafnar eftir hádegi í dag. Samkvæmt Jóhanni K. Jóhannssyni, upplýsingafulltrúa almannavarna, eru 25 um borð. Sagði DV frá því í gær að meirihluti áhafnar væri smituð. Þá sagði Einar Valur Kristjánsson, framkvæmdastjóri útgerðarinnar, í samtali við blaðamann DV í gærkvöldi að enginn þeirra væri alvarlega veikur. Nokkrir eru þó með einkenni eftir því sem heimildir DV herma.
Að sögn Jóhanns verður skipið einangrað þegar það kemur til hafnar. Mun umdæmislæknir sóttvarna á Vestfjörðum fara um borð í skipið og taka blóðsýni sem send verða í mótefnamælingu í Reykjavík. Málið hefur að sögn Jóhanns verið unnið í góðu samstarfi milli HG, almannavarna, umdæmislæknis og útgerðarinnar og hafa útgerðin, skipið og skipverjar unnið eftir fyrirmælum almannavarna.
Meðan beðið er eftir niðurstöðum mótefnamælingarinnar verða skipverjar um borð í skipi sínu og má því búast við að þeir verði þar til morguns. Þegar niðurstöður úr mælingunum liggja fyrir verða næstu skref ákveðin, að sögn Jóhanns. Jóhann segir að ekki sé tilefni til að hafa áhyggjur af ástandinu og ástæðulaust að óttast hvað við tekur.
Umdæmislæknir mun einn fara um borð í skipið og taka sýnin. Aðrir fá ekki að fara um borð eða frá borði að svo stöddu.
Skipið er nú kyrrstætt í miðju Ísafjarðardjúpi utan við Bolungarvíkurhöfn.
