Ófarir Jóa Fel virðast engan endi ætla að taka. Nú virðist stefna í að Jói missi húsið sitt í Garðabæ en sýslumaður hefur auglýst 60% eignarhlut Jóa í húsinu til uppboðs í næstu viku. Fer nauðungarsalan fram í húsnæði sýslumannsins á höfuðborgarsvæðinu í Kópavogi. Mannlíf greindi fyrst frá.

Í fyrrasumar varð Guðni Bakari gjaldþrota. Í samtali við blaðamann á þeim tíma sagði Jói að hann hafi átt helmingshlut í fyrirtækinu. Hlutinn keypti Jói árið 2017. Í lok síðasta mánaðar var Jói Fel, bakarískeðja Jóa úrskurðuð gjaldþrota að beiðni Lífeyrissjóðs verslunarmanna. Sagði DV frá því þá að Jói ynni að því að kaupa til baka nauðsynlega hluti úr þrotabúinu til þess að halda rekstrinum áfram. Það tókst ekki, og fór svo að lokum að Bakarameistarinn, höfuðkeppinautur Jóa, keypti þrotabúið með öllu sem því tilheyrði.

Gerðarbeiðandi að nauðungarsölu húss Jóa Fel í Garðabæ er Landsbankinn. Um er að ræða 270 fermetra einbýlishús við Markarflöt. Fasteignamat hússins er hvorki meira né minna en 107 milljónir.