Pattra Sriyanonge notar örsjaldan uppskriftir og elskar að prófa sig áfram í eldhúsinu. Hún borðar allt sem hugurinn girnist sem er vægast sagt fjölbreytilegt. Hún deildi nýlega með okkur hvað hún borðar á venjulegum degi.

Sjá einnig: Pattra er alæta og trúir að allt sé gott í hófi – Þetta borðar hún á venjulegum degi

Hér deilir hún með okkur uppskrift að morgunverðar-tortilla pítsu.

Hráefni

Heilhveititortilla

Pítsusósa* eða rautt pestó. Mér finnast heimatilbúnar sósur langbestar en hér er klárlega hægt að fara auðveldari leiðir.

Rifinn mozarellaostur

Hráskinka má sleppa

Aspas

4 egg

Þurrkað óreganó

Aðferð

1. Leggið tortillapönnuköku á pönnu eða plötu sem má fara inn í ofn.
2. Makið pítsusósu yfir pönnukökuna og stráið svo osti ofan á, því næst hráskinku og aspas-strimlum.
3. Næsta skrefið er að gera pláss fyrir eggin en mér finnst best að gera einhvers konar hreiður með aspasinum og skinkunni.
4. Komið svo eggjunum vel fyrir. Stráið þurrkuðu óreganó yfir og bakið í ofninum við 185 gráður, undir- og yfirhita í sirka 8-15 mín.
5. Það fer eftir því hvernig þið viljið hafa eggjarauðurnar eldaðar.
6. Þessi uppskrift er mjög einföld og hægt að hafa þennan rétt sem morgunmat, í brönsinn eða jafnvel hádegisverð. Slær alltaf í gegn!

*Auðveld heimatilbúin pítsusósa

½ dós hakkaðir tómatar

1 ferna tómata-paste

Salt, svartur pipar

Cayenne-pipar

Þurrkað óreganó

Basilíka

Teskeið af hvítlauks- og laukdufti

Smá skvetta af hunangi

Öllu blandað vel saman með handafli eða í matvinnsluvél.

Cayennepipar og þurrkað óreganó og basilíka eftir smekk.