Um hálfeittleytið í nótt voru afskipti höfð af manni á bar í Breiðholti sem er grunaður um brot á lyfjalögum. Þegar lögreglumenn nálguðust manninn reyndi hann að henda frá sér poka sem innihélt lyfseðilsskyld lyf. Áður hefur verið höfð afskipti af manninum vegna gruns um fíkniefnasölu.

Þetta kemur fram í dagbók lögreglu ásamt eftirfarandi:

Klukkan 2:40 í nótt var maður handtekinn á bar við Smiðjuveg. Maðurinn var ölvaður og er grunaður um eignaspjöll o.fl. Maðurinn var vistaður fyrir rannsókn máls í fangageymslu lögreglu.

Á níunda tímanum í gærkvöld var maður handtekinn í Grafarvogi, grunaður um húsbrot, heimilisofbeldi / líkamsárás, eignaspjöll, akstur undir áhrifum fíkniefna og að aka sviptur ökuréttindum. Maðurinn var vistaður fyrir rannsókn máls í fangageymslu lögreglu.