Logi Einarsson, formaður Samfylkingarinnar, er gefinn fyrir sviðsetningu, eins og sýndi sig í fréttatíma Stöðvar 2 síðastliðið miðvikudagskvöld. Heimir Már Pétursson spjallaði við hann í þinghúsinu þar sem Logi sagði að hugmyndir nýrrar ríkisstjórnar um skattalækkun myndu ekki gagnast þeim tekjulægstu heldur þeim tekjuhæstu. Til að skýra mál sitt var Logi búinn að setja á borð hangikjöt og tvær appelsíndósir og sagði að þetta fengju þeir tekjulægri gengju hugmyndirnar eftir. Á öðru borði var búið að koma fyrir alls kyns krásum, hangikjöti, rauðvíni, sælgæti, ostum og öðru góðgæti, sem samsvara átti þeirri búbót sem ríkisstjórnin væri að færa þeim efnameiri. Ekki fylgdi sögunni hver hefði borgað þessar kræsingar, en varla var það Stöð 2. Líklegra er að Samfylkingin hafi tekið upp budduna. Ekki er svo vitað hvað varð um matinn eftir að fréttaliðið hvarf af vettvangi, hvort Samfylkingin settist að snæðingi eða lét Fjölskylduhjálpina njóta, eins og hefði verið vel við hæfi.