Aðalfundur SÁÁ átti að hefjast klukkan 17 en það tók meira en klukkutíma fyrir fundargesti að komast að lendingu um hver yrði fundarstjóri. Þetta endaði með kosningum þar sem Hörður Oddfríðarson fékk 55% en Jón Magnússon 42,86 %. Aðrir skiluðu auðu. Hörður er hliðhollur framboði Einars Hermannssonar til formanns en Jón Magnússon hliðhollur framboði Þórarins Tyrfingssonar og því gætu þessar tölur gefið vísbendingu um hug fundargesta til formannsframbjóðendanna.
Mikil fjölmiðlaumfjöllun hefur verið um aðalfundinn og átökin í aðdraganda hans.
Fulltrúar framboðs Þórarins Tyrfingssonar og síðan fulltrúar framboðs Einars Hermanssonar hafa dreift sitthvorum listanum meðal fundargesta þar sem er að finna nöfn þeirra sem bjóða sig fram í stjórn fyrir hönd hvors framboðs. Meðfylgjandi eru myndir af þessum listum.
Lögð var fram tillaga um að flýta kosningum til stjórnar en hún var felld. Margir óttast að fundurinn verði óheyrilega langur.
Dagskrá fundarins er svohljóðandi:
1. Skýrsla stjórnar
2. Reikningar samtakanna lagðir fram
3. Lagabreytingar
4. Kosning í stjórn
5. Ákvörðun félagsgjalda
6. Önnur mál
Aðalstjórn SÁÁ er skipuð 48 manns en á hverjum aðalfundi eru kosnir 16 inn í stjórnina. Að fundinum loknum kýs aðalstjórnin síðan formann.
Samkvæmt heimildum DV mótmælti bróðir Þórarins tilögunni um að flýta kosningum og talað hann heldur lengi samkvæmt heimildarmönnum blaðsins.
Þá er andrúmsloftið spennuþrungið, en heimildarmaður DV sagði:
„Orðið persónulegt, fólki ekki heilsað og verið að enda vinskap á Facebook.“
Samkvæmt heimildarmanni DV eru um 500 manns á fundinum. Líkt og flestir vita er nú gildi samkomubann á samkomur þar sem að meira en 500 koma saman.
Sjá einnig: Rafmagnað andrúmsloft á aðalfundi SÁÁ – Blaðamanni vísað í burtu
