Tvítugur maður var í vikunni dæmdur í þriggja mánaða óskilorðsbundið fangelsi af Vestri-Landsrétti í Danmörku fyrir að hafa hóstað á lögreglumenn og hrópað „kóróna“. „Kórónuhrópin“ mat dómurinn sem hótun um ofbeldi.

Málið er fordæmisgefandi og hafði niðurstöðunnar verið beðið með spenningi. Undirréttur dæmdi manninn í 30 daga fangelsi fyrir að hafa flúið úr fangelsi en sýknaði hann af ákæru um að hafa haft í hótunum við lögreglumennina.

En Landsréttur sneri dómnum við og dæmdi hann í samtals þriggja mánaða fangelsi. Í dómsorði segir að hósti geti smitað fólk af sjúkdómum og að það skipti engu þótt maðurinn hafi ekki verið smitaður af kórónuveirunni, hótun hafi búið að baki.