Svavar Gestsson, fyrrverandi ráðherra, segir Katrínu Jakobsdóttur, formann VG, sýna kjark með því að hefja viðræður við Framsóknarflokkinn og Sjálfstæðisflokkinn. Hann segir á Facebook-síðu sinni að Katrín verði fyrir einkar ósanngjörnum og grimmum árásum frá Samfylkingarmönnum.

 „Katrín sýnir kjark að hefja viðræður við B og D. Hún er greinilega mikilhæfur stjórnmálaleiðtogi, það hefur margan grunað en sést best þessa daga þegar vegið er að persónu hennar. Því tekur hún með jafnaðargeði. Henni og flokknum er beinlínis skylt að kanna samstarf við B og D eftir að fjórflokkaviðræður bar upp á sker af því að B treysti sér ekki til að halda þeim áfram. Og eftir að S neitaði að láta reyna á viðræður við D,“ segir Svavar.

 Hann segir að margir stuðningsmenn VG séu hugsi yfir stöðunni. „Árásirnar á Katrínu eru einkar ósanngjarnar en þær eru greinilega grimmastar frá einum og einum Samfylkingarmanni. Auðvitað eru margir stuðningsmenn og flokksmenn VG hugsi yfir stöðunni. Það er ekkert óeðlilegt við það en snjallt væri held ég að við spöruðum stóru orðin hvert um annað – og þá er ég að tala um S og V – þar til skýrist hvað kemur út úr samtölum flokkanna. Er það ekki? Er annars komin stjórn í Þýskalandi? Þar voru kosningar í september,“ segir Svavar.

Svavar segir allt tal um minnihlutastjórn markleysu. „Var ekki stjórnin sem enn situr hér mynduð fyrr á þessu ári eftir ellefu vikna stjórnarkreppu? Það er engin ástæða til að láta eins og himnarnir séu að hrynja yfir okkur. Er einhver annar kostur en B og D í boði? Tilboð um minnihlutastjórn er markleysa enn sem komið er,“ segir Svavar.