Össur Skarphéðinsson, fyrrverandi þingmaður og ráðherra, skýtur föstum skotum á Katrínu Jakobsdóttur, formann Vinstri grænna, á Facebook-síðu sinni.

Fréttablaðið greinir frá því í dag að þingflokkur VG sé nú á fundi í þinghúsinu þar sem fastlega má gera ráð fyrir að farið verði yfir stöðuna í viðræðum VG, Sjálfstæðisflokks og Framsóknarflokks um mögulegt ríkisstjórnarsamstarf.

Þessir flokkar hafa átt í óformlegum viðræðum síðustu daga og eru taldar líkur á því að þessir þrír flokkar fari í formlegar viðræður áður en langt um líður.

Össur virðist ekki vera parhrifinn af því sem kann að vera að gerast í íslenskum stjórnmálum. Hann segir:

„Gerilsneyðing stjórnmálanna af málefnum birtist vel í þeirri stjórnarmyndun sem nú er komin vel áleiðis bak við tjöldin milli VG, Sjálfstæðisflokks og Framsóknar. Allar fréttir af henni snúast um ráðherrastóla. Í þeim er ekki minnst á málefni. Ekki orði. Prinsippfesta VG var einu sinni partur af kjölfestu í stjórnmálunum. Nú er hún til sölu fyrir forsætisráðherrastól. – Hver hefði trúað því að það yrði hlutskipti formanns VG að leiða til valda þá flokka sem til skamms tíma hétu alltaf „Panamaflokkarnir“ þegar VG opnaði munninn?