Höskuldur Gunnlaugsson, einn besti leikmaður Pepsi Max-deildar karla missti bróður sinn á síðasta ári. Hákon Guttormur Gunnlaugsson fæddist 19. maí 1991. Hann lést 10. ágúst síðastliðinn, aðeins 28 ára gamall.
Höskuldur sem spilar fyrir Breiðablik fékk tíðindin á laugardagskvöldi, daginn eftir var hann svo á skotskónum í sigri Breiðabliks á ÍA.
Þetta voru hryllileg tíðindi sem maður fékk á laugardagskvöldi og við eigum leik við ÍA á sunnudeginum. Ég var ekkert að pæla í þessum leik alla nóttina, var bara með fjölskyldunni. Þetta var mjög súrrealískt, högg á hjartað, alla sálina og líkamann,“ sagði Höskuldur við Stöð2 í gær.
Höskuldur ritaði fallegan pistil um Hákon skömmu eftir andlát hans, sem hann gaf þá DV leyfi til að birta. ,,Þú kveiktir áhuga minn á fótbolta þegar ég fékk að fara með upp á Akranes að horfa á þig spila á Lottó-Búnaðarbankamótinu, þú 6 ára gamall og ég 3ja ára,“ skrifar Höskuldur í upphafi greinar sinnar.
Þeir bræður voru duglegir að æfa sig saman. ,,Við æfðum okkur hvern einasta dag á bílaplaninu sem var á móti gamla húsinu á Hafnarbrautinni á Kársnesinu þar sem við ólumst upp. Við lékum eftir hetjuleg „móment“ í fótboltasögunni á borð við sigurmark Zinedine Zidane á móti Bayer Leverkusen árið 2002, líkt og við værum sjálfir að spila úrslitaleikinn í Meistaradeildinni.“
Það vakti athygli að Höskuldur væri mættur til leiks, svo skömmu eftir þetta áfall. „Ég fylgdi einhverju innsæi eða gut feeling. Langaði að spila þennan leik fyrir bróðir minn, fjölskylduna og mig sjálfan, sé ég ekki eftir því,“ sagði Höskuldur við Stöð2 en hann tileinkaður bróður sínum markið í leiknum.
Höskuldur segir það mikla vinnu að lifa með þessu. „Veröld manns hrynur og maður brotnar í milljón búta. Þetta hefur verið vinna að púsla sér saman, leita sér hjálpar hjá fagfólki og læra að lifa með þessu sem er helvítis vinna,“ sagði Höskuldur jafnframt við Stöð2.
