Í gær skýrðu spænsk yfirvöld frá því að tæplega 400 manns hafi látist af völdum COVID-19 á einum sólarhring. Aldrei fyrr hafa svo margir látist af völdum veirunnar á einum sólarhring þar í landi.
Nú hafa 1.772 látist af völdum veirunnar á Spáni. Staðfest smittilfelli eru 28.768. Landið er því meðal þeirra landa sem verst hafa farið út úr faraldrinum. Ástandið er verst á Ítalíu. En ef dánartölur þessara tveggja landa eru bornar saman á því stigi faraldursins, sem nú er á Spáni, þá eru þær mun hærri á Spáni en þær voru á Ítalíu.
Gjörgæsludeildir sjúkrahúsa í Madríd eru yfirfullar, þar liggja tvöfalt fleiri en þær ráða í raun við. Þörf er á um 1.500 gjörgæslurýmum til viðbótar.
Pedro Sanchez, forsætisráðherra, ávarpaði þjóðina á laugardaginn og sagði að „það versta væri enn framundan“. Enn eigi versta og skæðasta bylgjan eftir að ríða yfir. Hún muni svo sannarlega reyna á þjóðina.
Útgöngubann er í gildi á Spáni og þess er vænst að þingið samþykki á miðvikudaginn að framlengja það fram yfir páska.
