Frumvarpsdrög Áslaugar Örnu Sigurbjörnsdóttur, dómsmálaráðherra, um ný heildarlög um mannanöfn var kynnt í samráðsgáttinni í gær. Frumvarpinu er ætlað að auka til muna frelsi við nafngjöf og afnema eins og mögulegt er þær takmarkanir sem eru í dag á skráningu nafna, bæði eiginnafna og kenninafna, og auka heimildir til nafnbreytinga, líkt og segir í drögunum:
„Er þannig leitast við að koma til móts við ríkjandi viðhorf í samfélaginu um mannanöfn.“
Í drögunum er nefnt að aðeins skuli lágmarksákvæði um skyldu til skráningar nafna vera við lýði og réttur fólks til að ráða sjálft nöfnum sínum og barna sinna verði festur í sessi:
„Og á sama tíma reynt að draga úr afskiptum opinberra aðila með hliðsjón af friðhelgi einkalífs.“
Af þessu leiðir að þörfin fyrir mannanafnanefnd er engin:
„Þar sem frumvarpið felur í sér að skráning nafna verði háð óverulegum takmörkunum er gert ráð fyrir að mun minni þörf verði fyrir aðkomu nefndar eins og mannanafnanefndar. Er því lagt til að hún verði lögð niður. Um ágreiningsmál sem upp kunna að koma verði úrskurðað í ráðuneytinu en reiknað er með að mun færri mál muni sæta kæru en verið hefur.“