Elías Már Ómarsson, íslenskur landsliðsmaður í knattspyrnu skuldar skattaryfirvöldum í Svíþjóð 357 þúsund sænskar krónur. Göteborgs-Tidningen segir frá en Íslendingavaktin vakti fyrst athygli á málinu.
Um er að ræða fimm milljónir íslenskra króna sem skatturinn í Svíþjóð segir að Elías hafi ekki greitt. Elías lék með sænska félaginu Gautaborg en fór þaðan árið 2018.
Skattyfirvöld hafa ítrekað skuld hans reglulega en rannsókn er lokið og skuld Elíasar þarf að greiðast innan tíðar.
Um er að ræða 14 skipti sem skatturinn segir að Elías hafi ekki greitt skatta, átta þeirra tengjast launagreiðslum frá Gautaborg. Sex eru svo vegna vegatolla sem Elías hefur þá gleymt að greiða.
,,Ég hef enga hugmynd um hvað þetta getur verið, ég veit ekkert. Ég laga þetta ef þetta eru mistök. Veist þú hvernig ég get haft samband,“ sagði Elías við sænska miðla.
„Umboðsmaðurinn minn er nú að athuga þetta og ef eitthvað þarf að gera þá munum við auðvitað laga það,“ sagði Elías svo.
Ólafur Garðarsson, umboðsmaður Elíasar ræðir nú við skattyfirvöld og efast um að þetta sé rétt upphæð.