Sendiráð Íslands í Moskvu brá á það ráð í morgun að birta sérstaka tilkynningu þess efnis að útlendingar fá ekki greitt sérstaklega fyrir að kvænast íslenskum konum.

Tilkynningin birtist á Facebook-síðu sendiráðsins í morgun og vakti talsverða athygli. DV lék forvitni á að vita hvað varð til þess að sendiráðið ákvað að birta umrædda tilkynningu.

„Þetta er gamall draugur sem er aftur kominn á kreik,“ segir Sveinn H. Guðmarsson, upplýsingafulltrúi utanríkisráðuneytisins, í samtali við DV.

„Þessi saga hefur af og til farið á kreik um að íslensk stjórnvöld hafi sett einhverskonar lög eða reglugerð um að erlendum karlmönnum sé borgað fyrir að koma til Íslands og kvænast íslenskum konum,“ segir Sveinn en þeir oftast verið sagðir fá fimm þúsund Bandaríkjadali, rúmar 600 þúsund krónur.

„En nú þegar þetta er komið aftur á kreik er búið að hækka upphæðina í tíu þúsund evrur,“ segir Sveinn en það eru tæplega 1,4 milljónir króna. Sveinn segir að sendiráðið hafi fengið þó nokkrar fyrirspurnir að undanförnu hvort þetta sé rétt. „Það eru nokkur símtöl og um helgina held ég að hafi komið sjö tölvupóstar,“ segir hann.

Árið 2016 var fyrst greint frá því að stjórnvöld hér á landi greiddu erlendum mönnum sérstaklega fyrir að kvænast íslenskum konum. Var það sagt vera vegna skorts á karlmönnum á Íslandi. Þetta er vitanlega úr lausu lofti gripið en allar götur síðan hefur reynst erfitt að kveða þennan orðróm í kútinn.