Guðrún Ögmundsdóttir var borin til grafar í dag. Það hafa margir skrifað sérlega fallegar greinar um hana, enda er söknuðurinn mikill eftir þessari einstöku konu. Sjálfur setti ég saman grein um hana fyrir fáum dögum.
En þetta hér er á dálítið öðrum nótum.
Á YouTube er að finna lög úr merkilegum sjónvarpsþætti frá 1967 en þar léku Hljómar, þá langvinsælasta hljómsveit Íslands, lög af sinni stóru nýútkomnu stóru plötu sem innihélt marga smelli. Þetta var við upphaf blómatímans, það voru blóm í salnum og Hljómarnir klæddir í föt í litríkum mynstrum – en allt var auðvitað í svarthvítu.
Lögin voru auðvitað ekki tekin upp á staðnum, þetta var svokallað playback, þeir Gunnar, Engilbert, Rúnar og Erlingur þóttust spila en í kynningunum á milli laganna voru þeir ákaflega feimnir.
Í upptökusalnum var svo ungt og gjörvilegt fólk. Þar á meðal má bera kennsl á Gunnu Ö. Hún hefur ekki verið nema 17 ára þarna eða nýorðin 18, myndskeiðið þar sem hún sést byrjar á 44ðu sekúndu.
https://www.youtube.com/watch?v=yDRTHAd6ZJM
