Það virðist vera orðið nokkuð ljóst að KSÍ sé að ganga frá samningum við Puma, um að fara yfir í treyjur frá þeim. Landsliðið hefur um langt skeið verið í treyjum frá Errea.
Ekki er ljóst hvort Puma treyjurnar verði teknar í notkun fyrir sumarið, þar sem Ísland gæti tekið þátt á EM í fótbolta. Samningurinn við Errea ku renna út þegar mótið er í gangi.
Erlendir fjölmiðlar fjalla um málið og segja að treyjan sem Puma sé að hanna verði ekki með jafn sterkum bláum lit og síðasta treyja Errea, talað er um að liturinn sé kallaður „Electric Blue Lemonade“ og má sjá hann hér að neðan, eftir á að hanna treyjuna sjálfa.
Sagt er að treyjurnar séu hannaðar þannig að þær tengist náttúru Íslands. ,,Ísland er þekkt fyrir magnað landslag, þar sem eldur og ís mætast. Treyjan mun tengjast því,“ sagði heimildarmaður FootyHeadlines.com.
Þá er fullyrt að varabúningurinn verði áfram hvítur eins og síðustu ár. Taka skal fram að þetta eru ekki treyjurnar sem Ísland mun leika í, en litir þeirra eru sagðir vera á þessa leið.
