„Flotpúðar fyrir börn gera mig dauðhrædda og ég vona að þeir hræði líka foreldra,“ segir Kyran Quinlan, aðstoðarprófessor í barnalækningum við Rush University Medical Center og fyrrverandi stjórnarformaður samtaka barnalækna í Bandaríkjunum.

Svokallaðir flotpúðar, sem settir eru utan um háls barna til að halda þeim á floti í vatni, virðast njóta vaxandi vinsælda. Quinlan og fleiri til vara hins vegar við notkun slíkra púða því þeir geta verið hættulegir ef loft byrjar að leka úr þeim.

„Hér er um hugsanlega dauðagildru að ræða. Það er hræðilegt að hugsa til þess að einn illa þéttur saumur geti orðið þess valdandi að barnið þitt fari á kaf,“ segir Kyran við breska blaðið Independent.

Í frétt Independent kemur fram að þessir púðar njóti vaxandi vinsælda og margir foreldrar hafi birt myndir á samfélagsmiðlum af börnum sínum með þá. Einhverjum þyki þeir sniðugir því foreldrar þurfi ekki að halda í börn sín eða fara ofan í sundlaugina með þeim. Að gera slíkt getur þó reynst stórhættulegt því börn geti drukknað á örskotsstund.

Kaylë Burgham, hjá samtökum sundkennara í Bretlandi, segir að flotpúðar eins og þessi séu ekki það sem börn vilja eða þurfa. Mikilvægt sé að veita börnum öryggi í sundi og kynna þau fyrir vatninu í afslöppuðu, öruggu og skemmtilegu umhverfi. Fleiri samtök hafa látið sig málið varða, þar á meðal eru samtökin Birthlight sem vara við notkun púðanna.