Styrkja börn með meðfædda ónæmisgalla
Þórunn Eva Guðbjargardóttir Thapa og Silja Rut Sigurjónsdóttir stofnuðu samtökin Zebrabörn. Samtökin eru lítil deild innan samtakanna Lindar, félags um meðfædda ónæmisgalla. Og nú eru komnar í sölu gullfallegar zebramyndir, teiknaðar af Bergrúnu Írisi, og rennur ágóði af sölu myndanna óskertur til Zebrabarna.
„Við Silja eigum báðar börn sem eru með meðfædda ónæmisgalla,“ segir Þórunn Eva. „Samtökin Zebrabörn eru sérstaklega tileinkuð börnum sem fæðast með ónæmisgalla. Að eiga langveikt barn hefur veruleg áhrif á líf allra í fjölskyldunni, en við reynum að eiga eins eðlilegt fjölskyldulíf og hægt er. Það getur þó verið erfitt þegar maður er minntur á veikindin daglega. Það er eiginlega ekki hægt að vera í vinnu, en ríkið er lítið sem ekkert að aðstoða fjölskyldur. Það er erfitt að ganga í gegnum lyfjagjafir, spítalaferðir og veikindi sem fylgja því að eiga langveik börn og við vildum því leggja okkar af mörkum til að létta undir með og aðstoða börnin og foreldra þeirra.“
Þær hófu vinnu við herferðina í maí síðastliðnum og nýlega leit afraksturinn dagsins ljós í boði sem haldið var í Bílaumboðinu Öskju, gullfallegar zebramyndir í A5 stærð, teiknaðar af Bergrúnu Írisi Ævarsdóttur.
„Herferðin er okkur hjartans mál, enda varð hún til vegna barnanna okkar. Sem foreldrar gerum við allt sem við mögulega getum fyrir börnin okkar, því þau eru það dýrmætasta sem við eigum. Við erum glaðar og lífshamingjan alltaf stutt undan og við munum halda ótrauðar áfram,“ segir Þórunn Eva.
Þess má einnig geta að Jón Sverrir, 13 ára gamall sonur Þórunnar, ætlar að hlaupa til styrktar Einstökum börnum í Reykjavíkurmaraþoninu í ágúst næstkomandi.
Ágóði myndanna rennur óskertur til Zebrabarna, en tilgangur þeirra er að fjármagna fræðslu í þágu sjúkdómsins.
