Í nýrri rannsókn, sem var birt í vísindaritinu Science í síðustu viku er fjallað um málið. Það voru vísindamenn við Caltech og hjá geimferðastofnuninni NASA sem gerðu rannsóknina. Þeir rannsökuðu afleiðingar skjálftanna í júlí. Í ljós kom að misgengi, sem er nefnt Garlock, „vaknaði“ við skjálftana í júlí og er nú á hreyfingu en það er í fyrsta sinn síðan mælingar hófust sem það hefur gerst.
Los Angeles Times hefur eftir Zachary Ross, aðalhöfundi rannsóknarinnar, að það hafi komið á óvart að sjá hreyfingu á Garlock, það hafi aldrei áður gerst. Ekki sé vitað hvað þetta þýði.
Jarðskjálftarnir við Ridgecrest voru þeir öflugustu í Kaliforníu áratugum saman, sá stærsti mældist 7,1. Skjálftarnir urðu til þess að hlutar Garlock hafa hreyfst til. Í niðurstöðum sínum segja vísindamennirnir að þetta þýði að endurmeta verði áhrif jarðskjálfta því fram að þessu hafi yfirleitt ekki verið horft á áhrifin á önnur misgengi.
The Guardian hefur eftir Ross að ómögulegt sé að leggja mat á hvað þessar nýju hreyfingar á Garlock muni hafa í för með sér. Þetta valdi ákveðinni óvissu og erfitt sé að draga allar stöðumyndir upp, endalausir möguleikar séu fyrir hendi varðandi atburðarrásina. Líkur séu á stórum og öflugum skjálftum ef misgengið verður óstöðugt og hreyfist meira.
