Maðurinn sem sprengdi sig í loft upp eftir tónleika með Ariönu Grande í Manchester í gærkvöldi hét Salman Abedi. Hann var 23 ára. Þetta kemur fram í fréttum breskra fjölmiðla í dag.
Staðfest hefur verið að 22 létust og yfir eitt hundrað særðust þegar maðurinn sprengdi sig í loft upp.
Hryðjuverkasamtökin ISIS lýstu yfir ábyrgð á ódæðinu í dag með stuttri yfirlýsingu. Breska lögreglan hefur ekki staðfest það að ISIS hafi verið á bak við árásina og í umfjöllun CBS News er bent á það að ónákvæmni hafi gætt í yfirlýsingu samtakanna. Þannig kom fram að árásarmaðurinn hefði komið nokkrum sprengjum fyrir en ekkert bendir til annars en að ein sprengja hafi sprungið.
Rannsókn lögreglu beinist meðal annars að því hvort maðurinn hafi verið einn að verki eða hvort einhver annar hafi komið að skipulagningu voðaverksins. Fyrr í dag var greint frá því að 23 ára karlmaður hefði verið handtekinn í tengslum við rannsókn málsins.
Í frétt Mail Online kemur fram að Abedi hafi verið breskur ríkisborgari af líbískum uppruna. Fullyrt er að lögregla hafi „vitað“ af honum án þess að það sé útskýrt nánar. Lögregla rannsakar nú meðal annars myndefni úr öryggismyndavélum til að varpa ljósi á ferðir hans áður en hann lét til skarar skríða.
