Ef maður þarf að renna til í dýraskít og slasa sig þá er greinilega gott að það gerist á breskri lestarstöð. BBC fékk nýlega yfirlit yfir hvernig Network Rail tekur á kvörtunum farþega sem detta á lestarstöðvum á Bretlandseyjum.

Í ljós kom að á síðustu fimm árum greiddi fyrirtækið sem nemur rúmlega 140 milljónum íslenskra króna í bætur til 290 farþega sem höfðu dottið og slasast í tengslum við lestarferðir.

Hæsta upphæðin var sem nemur um sex milljónum íslenskra króna. Hana fékk farþegi sem steig í óþekktan vökva á Charing Cross stöðinni í Lundúnum og datt. Annar fékk sem nemur um 4 milljónum íslenskra króna eftir að hann steig í dúfuskít og datt á Paddington Station.

En það er ekki ávísun á svimandi háar bætur að stíga í dúfuskít og detta. Tveir farþegar sem einnig lentu í þessu fengu mun lægri bætur eða sem nemur á milli 100.000 og 200.000 íslenskum krónum.