Fyrrverandi fréttastjóri og ritstjórar DV lögðu íslenska ríkið vegna umfjöllunar um Sigurplastsmálið – „Nú blasir við að sækja réttlæti á hendur þeim sem bera ábyrgð“
Mannréttindadómstóll Evrópu hefur dæmt fyrrverandi fréttastjóra og fyrrverandi ritstjórum DV í vil vegna umfjöllunar DV um rannsókn lögreglunnar á meintum lögbrotum sem talið er að hafi átt sér stað hjá iðnfyrirtækinu Sigurplasti frá því árið 2007 og þar til félagið var tekið til gjaldþrotaskipta haustið 2010. Skiptastjóri Sigurplasts og Arion banki, aðalkröfuhafi félagsins, kærðu stjórnendur Sigurplasts til efnahagsbrotadeildar ríkislögreglustjóra, lögreglunnar á höfuðborgarsvæðinu og skattrannsóknarstjóra vegna gruns um meint lögbrot, meðal annars skattalagabrot, veðsvik, skilasvik, umboðssvik og fjárdrátt.
Í desember árið 2012 voru þáverandi fréttastjóri, Ingi Freyr Vilhjálmsson, og ritstjórar DV, Reynir Traustason og Jón Trausti Reynisson, dæmdir í Hæstarétti til að greiða Jóni Snorra Snorrasyni, stjórnarformanni Sigurplasts og lektor við viðskiptafræðideild Háskóla Íslands, miskabætur auk þess sem tvenn ummæli úr umfjöllun blaðsins voru dæmd dauð og ómerk.
Ummælin sem um var að ræða voru „Lögreglan rannsakar lektor“ og „Lektor flæktur í lögreglurannsókn.“ Dómurinn komst að þeirri undarlegu niðurstöðu að rangt hefði verið að segja að Jón Snorri hefði verið „til rannsóknar“ hjá lögreglu og að orðalagið „til skoðunar“ hefði átt betur við á þessum tíma. Þó hófst lögreglurannsókn vegna málsins skömmu eftir að fréttin birtist í DV og lauk henni ekki fyrr en í lok maí, byrjun júní árið 2013.
DV ákvað í byrjun júní 2013 að kæra niðurstöðu Hæstaréttar til Mannréttindadómstóls Evrópu, sem nú hefur komist að þeirri niðurstöðu að íslenska ríkið braut gegn 10. grein Mannréttindasáttmála Evrópu um tjáningarfrelsi.
Reynir Traustason tjáir sig um niðurstöðuna á Facebook í morgun þar sem hann segir að skömm íslenska ríkisins sé mikil.
„Einn eitt dómsmorð íslenska réttarkerfisins staðfest af Mannréttindadómstólnum. Eina meiðyrðamálið sem ég var dæmdur fyrir er fallið. Skömm íslenska ríkisins og sérstaklega Hæstaréttar er mikil. Nú blasir við að sækja réttlæti á hendur þeim sem bera ábyrgð.“
Sigurplastsmálið bætist nú í hóp fjölmargra mála þar sem íslenskir blaðamenn hafa sigur gegn íslenska ríkinu fyrir Mannréttindadómstól Evrópu.
