Forsvarsmenn veitingastaðakeðjunnar Pizza Hut tilkynntu það í vikunni að fimm hundruð veitingastöðum keðjunnar verði lokað á næstu tveimur árum. Today segir frá, en samkvæmt fréttinni eru tæplega 7500 Pizza Hut-staðir í Bandaríkjunum. Fjöldi þeirra fer því niður í 7000 á næstu 24 mánuðum.

Ástæðan fyrir þessum lokunum er hins vegar ekki samdráttur að sögn forsvarsmanna Pizza Hut, heldur einungis stefnumótun. Ætlar fyrirtækið að færa sig frá hefðbundnum veitingastaðarekstri, þar sem viðskiptavinir geta fengið sér sæti og snætt, og einbeita sér meira að skyndibita og heimsendingarþjónustu. Er talið að þessi breyting gæti aukið gróða Pizza Hut til lengri tíma litið.

Ekkert annað er ljóst um langtímaplönin hjá Pizza Hut, en mikill uppgangur hefur verið hjá fyrirtækinu síðustu misseri. Á þessu ári er salan á pítsum og öðru matarkyns tveimur prósentustigum hærri en í fyrra og því þurfa aðdáendur staðarins ekki að örvænta yfir fregnum um lokanir.