Samkvæmt heimildum DV óttast ISAVIA mjög að WOW vélin, í eigu leigufélagsins ALC, sem verið hefur kyrrsett á Keflavíkurflugvelli undanfarna mánuði, verði farin úr landi áður en Landsréttur tekur að nýju á málinu. Héraðsdómur kvað upp þann úrskurð í morgun að ALC bæri eingöngu að greiða þær skuldir sem hvíldu á þotunni, en ekki aðrar, eins og ISAVIA krafðist. Jafnframt var kyrrsetningu á þotunni aflétt.

Samkvæmt heimildum DV mun ISAVA áfrýja niðurstöðunni til Landsréttar og fara fram að réttaráhrifum verði frestað þar til málið hefur verið tekið fyrir að nýju. Þetta þýðir að ISAVIA freistar þess að vélin verði áfram kyrrsett.  Hér eru menn  í kapphlaupi við tímann. Heimildamenn DV telja að það muni taka ALC að minnsta kosti tvo daga að senda áhöfn hingað til lands og gera vélina tilbúna til flugs. Fari hún úr landi áður en Landsréttur hefur tekið afstöðu sé málið fallið um sjálft sig.

Hvort raunhæft sé að Landsréttur geti eða muni breyta niðurstöðu héraðsdóms á þeim skamma tíma sem er til stefnu mun væntanlega koma í ljós síðar í dag eða í síðasta lagi á morgun.

UPPFÆRT KL 14:50 

Guðjón Helgason, upplýsingafulltrúi ISAVIA, staðfesti í samtali við DV að ISAVIA hefði þegar kært úrskurð héraðsdóms til Landsréttar með kröfu um að úrskurðurinn verði felldur úr gildi og að réttaráhrifum verði frestað, þannig að þota WOW verði áfram kyrrsett þar til endanleg niðurstaða fæst í málið.