Stjórnvöld í Norður-Kóreu segjast reiðubúin til að fara í stríð við Bandaríkin ef þau halda áfram að ögra Norður-Kóreu og auka við hernaðarmátt sinn í Kóreu. Þessi skilaboð sendu stjórnvöld frá sér í gegnum ríkisfréttastofuna KCNA. Ástæðan er að Bandaríkin hafa stefnt einni flotadeild með flugmóðurskipið Carl Vinson í fararbroddi í átt til Kóreu.

Carl Vinson átti að vera á leið til Ástralíu en þeirri áætlun var breytt um síðustu helgi og stefnan tekin á Kóreu. Markmið Bandaríkjanna með þessu er að sýna stjórnvöldum í Norður-Kóreu hvers Bandaríkin eru megnug á hernaðarsviðinu og að vera óbein aðvörun til einræðisstjórnarinnar um að þolinmæði Bandaríkjanna, gagnvart síendurteknum tilraunum Norður-Kóreu með langdrægar eldflaugar og kjarnorkuvopn, sé á þrotum.

Samkvæmt því sem KCNA segir þá sýnir ferð flotadeildarinnar enn betur að Bandaríkin ætla sér leynt og ljóst að ráðast á Norður-Kóreu og að nú hafi þessar fyrirætlanir náð nýju stigi. Fréttastofan segir að Norður-Kórea sé undir þetta búin og muni bregðast við sérhverri ögrun frá Bandaríkjunum.

Margir hafa túlkað flugskeytaárás Bandaríkjanna á herflugvöll í Sýrlandi í síðustu viku sem aðvörun til stjórnvalda í Norður-Kóreu um að sömu örlög geti beðið þeirra.

Donald Trump, Bandaríkjaforseti, hefur beðið ráðgjafa sína að leggja fram tillögur um hvernig er best að taka á Norður-Kóreu og halda aftur af vopnaskaki þarlendra stjórnvalda. Trump hefur einnig lýst því yfir að Bandaríkin séu reiðubúin til að láta til skara skríða gegn Norður-Kóreu ein síns liðs ef Kínverjar, sem eru einu bandamenn Norður-Kóreu, haldi ekki aftur af vopnaskaki Norður-Kóreumanna.