Yfirvöld í New York ríki í Bandaríkjunum ætla að banna kattaeigendum að láta draga klærnar af köttum sínum. Framvegis má aðeins gera það ef dýralæknir telur það nauðsynlegt vegna heilsu kattarins. Andrew Cuomo, ríkisstjóri, á enn eftir að skrifa undir lögin og staðfesta.

Það mun vera mjög algengt í Bandaríkjunum að fólk láti draga klærnar af köttum sínum en í því felst að hluti af beininu, sem tengir nöglina við fótinn, er skorinn af. Gagnrýnendur segja þetta vera „villimannslegt og ómannúðlegt“.

BBC skýrir frá þessu. Fram kemur að víða um heim sé þetta ólöglegt, þar á meðal í mörgum Evrópuríkjum, Brasilíu, Ísrael, Ástralíu og Nýja Sjálandi.

En af hverju er þetta svona algengt í Bandaríkjunum? BBC hefur eftir Sarah Endersby, dýralækni, að stundum sé nauðsynlegt að gera þetta, til dæmis ef köttur er með sýkingu í nöglinni. Margir láti gera þetta til að kettirnir klóri ekki húsgögn. Hún benti einnig á að í Bandaríkjunum sé mjög algengt að kettir séu alltaf innandyra ólíkt því sem er í Evrópu.

Niðurstöður nokkurra rannsókna benda til að þetta hafi verið gert við 20 til 25% bandarískra katta.