Vilhjálmur Birgisson, formaður Verkalýðsfélags Akraness og 1. varaforseti ASÍ, bíður eftir að bankarnir lækki vexti. Eins og fram hefur komið lækkaði Seðlabankinn stýrivexti sína um 0,5 prósent í vikunni.

„Á þeirri forsendu bíð ég núna eftir að það hrynji inn tilkynningar frá bankakerfinu um lækkun á vöxtum og ekki bara hjá bankakerfinu heldur einnig hjá lífeyrissjóðunum,“ segir Vilhjálmur á Facebook-síðu sinni og bætir við:

„Eitt er víst að við í verkalýðshreyfingunni bíðum spennt eftir að sjá tilkynningu frá fjármálakerfinu í heild sinni tilkynna lækkun vaxta enda ekki nokkur forsenda fyrir öðru en að á næstu dögum lækki vextir um 0,5%,“ segir hann.

Hann bætir við að verkalýðshreyfingin muni fylgjast mjög vel með þróun vaxtakjara hjá fjármálakerfinu. „Og það verður alls ekki látið átölulaust ef stýrivaxtalækkun Seðlabankans skilar sér ekki í lækkun á vaxtakjörum til almennings og fyrirtækja á næstu dögum! Ég biðla líka til fjölmiðla um að kalla eftir því frá fjármálakerfinu hvenær þeir hyggist lækka vexti til samræmis við lækkun á stýrivöxtum Seðlabankans.“