„Þetta var eins og við værum að stökkva fram af kletti og við vissum ekki hvert við vorum að fara,“ segir Klemens Hanagan um þann gjörning Hatara að halda á lofti palestínskum fánum í sjónvarpsútsendingu frá Eurovision. Þeir Hatara-liðar, Matthías Tryggvi Haraldsson, Klemens og Einar Stefánsson (Trommugimpið), voru í viðtali í Kastljósi í gærkvöld þar sem farið var yfir þetta ævintýri.
„Þetta voru ekki fánar heldur palestínskir borðar,“ segir Matthías og greindi frá því hvernig borðarnir komust í hendur þeirr í Hatara, en það er stórmerkileg saga:
„Fréttamannahópur miðilsins Music News fór yfir landamærin til Ramallah í Palestínu og smyglaði þessum borðum yfir landamærin. Þau lýstu þessu sem mjög stressandi upplifun þar sem þau þurftu að ganga í augsýn ísraelskra hermanna með þessa klúta inni á sér.“
Klemens greindi frá því að borðarnir hefðu verið keyptir í leikfangaverslun sem var opnuð sérstaklega fyrir fréttamennina en flestar verslanir voru lokaðar þar sem núna er föstumánuðurinn Ramadan.
Geymdi Palestínu-borðann í stígvélinu
Hatara-liðar vissu ekki hvort og hvenær tækifæri gæfist til að hampa palestínsku borðunum í mynd. Þeir sögðust hafa verið tilbúnir ef tækifærið gæfist. Svo tóku þeir eftir því að myndavélum var varpað á flytjendur þegar tilkynnt var um niðurstöðu símakosningar fyrir viðkomandi land, sérstaklega ef mikill munur var á símakosningunni og niðurstöðum dómnefndar.
„Þegar tökumaður koma hlaupandi í áttina að okkur og benti aðeins á myndavélina vissi ég að núna var mómentið komið og ég kinkaði kolli til Klemens,“ segir Matthías, en hann geymdi borðann sinn í öðrum skónum, „Hatara-stígvélinu“:
„Ég dreg minn borða út úr skónum og þegar ég endurupplifi mómentið í huganum þá er ég bara svo feginn að borðinn sneri rétt. Hann hefði auðveldlega getað verið á hvolfi,“
segir Matthías.
Klemens lýsti því að stemningin í Græna herberginu hafi fljótt orðið mjög skrýtin eftir uppátæki Hatara. Tónlistarfólkið hafi fyrst og fremst orðið undrandi en áhorfendur sem keyptu sig inn á sérstakt VIP-svæði hafi orðið mjög fjandsamlegir og baulað stíft á Hatara.
Hvað varðar umræðuna og fjölmiðlaumfjöllunina eftir keppnina, þá sagði Matthías:
„Maður er búinn að læra það af þessu að maður eigi ekki að taka of mikið mark á kommentakerfum fjölmiðla.“
