Landsréttur staðfesti í gær úrskurð héraðsdóms um að karlmanni yrði gert að sæta nálgunarbanni. Maðurinn er grunaður um ofbeldi gagnvart barnsmóður sinni sem og barni.

Barnsmóðir mannsins hefur kært hann fyrir heimilisofbeldi og kynferðisbrot. Greinir hún svo frá að eftir að hún hafi slitið sambandi við barnsföður sinn hafi hann farið að dreifa hefndarklámi í formi mynda sem hann hafi tekið af henni á meðan á sambandi þeirra stóð.

Samkvæmt rannsókn lögreglu sendi maðurinn 121 tölvupósta á tímabilinu 4. febrúar til 29. mars á 234 mismunandi tölvupóstföng. Tölvupóstarnir innihéldu nektarmyndir af barnsmóður hans.  Háttsemin falli undir andlegt ofbeldi og sér sérstaklega meiðandi. Sendi hann sömuleiðis afrit af öllu póstunum á barnsmóður sína.

Í úrskurði segir að þegar barnsmóðirin hafi beðið manninn að flytja af heimili þeirra hafi hann „tryllst, sparkað í síðuna á henni og hellt yfir hana mjólk og slegið son þeirra [X] ára, kinnhesti er hann reyndi að stöðva föður sinn.

Talið var að nálgunarbann væri vægasta úrræðið til að reyna að tryggja frið konunnar, en maðurinn hafði fært lögheimili sitt til hennar eftir að rannsókn lögreglu hófst og sendi henni ýmis skilaboð sem lögregla taldi fela í sér andlegt ofbeldi og blygðunarsemisbrot.

Á meðan á nálgunarbanni stendur yfir má maðurinn ekki koma á eða nálægt heimili hennar, eða ekki nær en því sem nemur 50 metra radíus umhverfis heimilið. Þessi lengdarmörk gilda líka um vinnustað hennar. Hann má heldur ekki veita henni eftirför, nálgast hana á almannafæri eða hafa samband við hana með síma, í gegnum samfélagsmiðla, í tölvupóst eða með öðrum hætti. Nálgunarbannið er til sex mánaða.